ភ្នំពេញ៖ នាយករដ្ឋមន្ត្រីកម្ពុជា សម្តេចមហាបវរធិបធី ហ៊ុន ម៉ាណែត បានបញ្ជាក់ថា វិធានការផ្អាកការនាំចូលគ្រឿងក្នុង និងបំណែកសាច់បង្កកមួយចំនួនរយៈពេល ៦ខែចាប់ពីខែមីនាតទៅនេះ គឺធ្វើឡើងដើម្បីលើកកម្ពស់ការចិញ្ចឹមសត្វ និងជំរុញឱ្យផលិតផលសាច់ក្នុងស្រុកមានទីផ្សារ។

តែយ៉ាងណា សម្តេចធិបតី បានបញ្ជាក់ថា វិធានការនេះមិនមែនអនុវត្តជានិរន្តរនោះទេ។ សម្តេចធិបតី បានលើកឡើងថា ការផ្អាកការនាំចូលបំណែកគ្រឿងក្នុងសាច់បង្កកជាបណ្តោះអាសន្ននេះ គឺជាជម្រើសមួយដ៏ល្អសម្រាប់ផ្សារភ្ជាប់ទំនាក់ទំនងរវាងអ្នកចិញ្ចឹម និងអ្នកទិញ បើទោះបីវិធានការត្រូវបានដកចេញក៏ដោយ ជាពិសេសជំរុញឱ្យមានបង្កើនការចិញ្ចឹមសត្វ ហើយក៏ជាការជំរុញឱ្យប្រជាកសិករពង្រឹងលើការចិញ្ចឹមសត្វប្រកបដោយបច្ចេកទេស និងមានគុណភាព។

សម្តេចធិបតីថ្លែងដូច្នេះថា៖ «ការអន្តរាគមន៍នេះមិនមែនជាវិធានការមួយ សម្រាប់តែមានចីរភាពដែលយើងចង់ធ្វើគ្រប់ពេលវេលានោះទេ យើងត្រូវធ្វើយ៉ាងណាដើម្បីឱ្យមានចីរភាព វិធីសាស្ត្រយ៉ាងណាដើម្បីធានានូវការចិញ្ចឹមសត្វមានការប្រកួតប្រជែង»។

សម្តេចនាយករដ្ឋមន្ត្រីបានណែនាំឱ្យក្រសួង និងស្ថាប័នពាក់ព័ន្ធត្រូវរួមគ្នាបង្កើនភាពប្រកួតប្រជែង និងរួមគ្នាទប់ស្កាត់ការនាំចូលសាច់បង្កកពីក្រៅប្រទេស។

សម្តេចថ្លែងបែបនេះនៅក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងកសិកម្ម រុក្ខាប្រមាញ់ និងនេសាទ នារសៀលថ្ងៃទី៣០ ខែមករា ឆ្នាំ២០២៤៕